MARGAR FLUGUR Í EINU HÖGGI - TÖKUM ÞÁTT

Svaraðu kallinu!

18. desember 2008
Björgunarsveitir Slysavarnafélagsins Landsbjargar hefja í dag nýtt fjáröflunar- og endurvinnsluátak undir heitinu „Svaraðu kallinu!"

Átakið felst í því að björgunarsveitir safna gömlum gsm símum en ljóst er að slíkir símar leynast víða í skúffum og skápum landsmanna. Björgunarsveitirnar koma símunum áfram til þýska fyrirtækisins Greener Solutions sem sérhæfir sig í endurvinnslu og endurnýtingu á gsm símum, og fá greitt fyrir hvert eintak.

Greener Solutions flokkar símana, hluti þeirra fer í endurvinnslu þar sem ýmsir málmar, svo sem gull og palladium, og plastið er endurunnið. Þeir símar sem eru nothæfir eru gerðir upp og sendir til þróunarlanda þar sem þeir eru seldir á vægu verði.

Með þessu átaki hagnast allir; fólk losnar við gömlu símana, styrkir björgunarsveitir, sýnir umhverfisvernd í verki og aðstoðar fátækari íbúa heimsins að eignast síma sem oft koma að góðum notum, bæði félagslega og fjárhagslega.

Björgunarsveitirnar munu taka á móti gsm símum á flugeldasölustöðum um allt land en þeir opna sunnudaginn 28. desember.  Einnig verða settir upp kassar á bensínstöðvum N1 á höfuðborgarsvæðunum sem og í verslunum símafyrirtækja.

Athugasemdir

[Halldóra Halldórsdóttir, 18.12.2008 kl. 23:42]

Já - þetta mun ég gera. Stórsniðugt.

[Jóna Kolbrún Garðarsdóttir, 19.12.2008 kl. 01:15]

Ég er með svona 4-6 gamla gemsa í skúffunum hjá mér, ég gef þá alla.    Þetta er frábær hugmynd að endurnýta þessa gömlu síma. 

[Hólmdís Hjartardóttir, 19.12.2008 kl. 03:04]

Ég er ennþá að nota minn fyrsta...........

[Beturvitringur, 19.12.2008 kl. 03:50]

ég er á nr. 2. Gamli dó. Vonandi verður hann nýttur eftir gjörgæslu.

[Jóna Kolbrún Garðarsdóttir, 20.12.2008 kl. 03:25]

Ég er ennþá með fyrsta gemsann minn, ég kaupi batterí í hann í Finnlandi.  Ég er með svona gamlan Nokia 3310 síma sem er ábyggilega 8-9 ára gamall.  Ég seldi viðskiptavinum á barnum 2 batterí í vikunni.  Og græddi smá peninga, eða u.þ.b 500 krónur á hvoru batteríi.  Allir gömlu gemsarnir sem eru í skúffunum mínum eru símar sem börnin mín hafa keypt.  Ég þarf að fara að leita af þessum gömlu gemsum. 

[Nefródíta 20.12.2008 kl. 16:41]

Beturvitringur, ertu í björgunarsveit?

Ég á einn gamlan GSM. Ég neyddist til að kaupa nýjan af því að ég fékk ekki batterí í þann gamala á Íslandi. Ætla að gefa björgunarsveit hann.

[Beturvitringur, 20.12.2008 kl. 17:01]

Nei, mín kæra, Beturvitringur bjargar ekki nokkrum sköpuðum hlut né kvikindi, - ætlar þó að gefa síma nr.1 af því að rafhlaðan í hann kostaði jafn mikið og nýr sími.

Vona að allir taki vel í þetta. Verst hvað Íslendingar eru (hafa verið) fúsir til að henda öllu í ruslið.