Virðulegur starfsmaður ber litla virðingu fyrir starfi sínu hjá Virðingu

Mér finnst svo lítið um þetta fjallað að ég leitaði í fréttamiðlum - að mig hefði ekki dreymt þetta. Er nefnilega oft með útvarpið á alla nóttina og á það til að halda nú sé maður heldur en ekki orðinn berdreyminn, vegna þess að undirmeðvitundin hefur "heyrt og vistað" það sem sagt er í útvarpinu!!

Fjandi er orðin þörf á að fægja nokkra geislabauga landans. Vorum við ekki svo hamingjusöm, falleg, sterk og heiðarleg (töldumst lítt spillt í könnunum).

Eru allir sem maður treystir einhverjir undanvillingar?

Held ég fái ristilkrampa af því að hugsa um þetta, svo ég fæ mér bara hrátt grænmeti til að fá krampann. Þá fatta ég ekki að þetta er kreppukrampi.

Laxness, aðspurður hvað gera skyldi; fólk væri orðið leitt á "Óskalögum sjúklinga", sagði auðveldast að skipta þá um sjúklinga.

Einhver hafði á orði nýlega að úr því að ekki væri hægt að skipta út stjórn og spillingaröflum þjóðarinnar, - þyrftum við bara þá að skipta um þjóð!   Samþykkt samhljóða af mér. 

Þeir sem enn hafa ekki lesið bókina FALIÐ VALD - eru enn með blæjuna yfir heilanum. LESTU HANA!!!

Falið vald, Jóhannes Björn Lúðvíksson (f.1949)  - Íslenska bókaútgáfan ehf., 1997

Risavaxnar millifærslur hjá Virðingu hf

Of gott til að stela þessu EKKI

Vont að sjá forsætisráðherra vorn í slagtogi með þessum "herrum". 

Fékk þetta sent frá einhverjum sem ég þekki ekki:

Þarf nokkur að spara? (Getur reynst dýrt að reka 900m2 bústað : ( )

Ef til vill ekki gustuk að leiðbeina við raforkusparnað þar sem það gæti vel orðið til þessa að orkuveitan hækkaði raforkuverð VEGNA MINNI NOTKUNAR, enda fordæmi fyrir því (á hlýju sumri forðum) 

En það er samt góðra gjalda vert að þeir gáfu út þessar leiðbeiningar - sem sagt í boði orkusala:

Rafmagnssparnaður

Hvað get ég gert til að spara rafmagn?

Almennt þú getur auðvitað sparað með því að nota færri raftæki og nota þau minna, en að auki er ýmislegt hægt að gera til frekari sparnaðar. Oft nota ný heimilistæki talsvert meira rafmagn en gert var ráð fyrir, dæmi eru vatnsrúm og stórir tölvuskjáir.

Notið rétta ljósgjafa
Rétt val á ljósgjafa er mikilvægt. Notið ekki stærri perur en þið þurfið og gætið að því að lampabúnaðurinn dragi ekki um of úr birtu. Notið flúorpípur þar sem þess er kostur.

Notið ljósa liti í umhverfið Umhverfið ræður miklu um hve mikla lýsingu þarf. Ljósir litir á lofti, veggjum, gluggatjöldum og gólfum geta sparað mikla lýsingu. Haldið lömpum hreinum.

Slökkvið á eftir ykkur
Munið að slökkva á eftir ykkur. Oft loga ljós að óþörfu þar sem engin hefst við. Slíkt getur einnig skapað eldhættu.

Uppþvottavélin
Fyllið uppþvottavélina. Hún notar jafnmikla orku hvort sem mikið eða lítið er þvegið í einu.  Notið sparnaðarhnappinn (E) eins oft og kostur er.  Potta og önnur áhöld sem taka mikið rými, er ekki hagkvæmt að þvo í uppþvottavélinni.
Þvoið upp sem fyrst svo að matarleifar nái ekki að þorna. Þá nægir styttra þvottakerfi og lægra hitastig.

Þvottavélin
Fyllið vélina af þvotti. Það kostar álíka mikið að þvo lítinn og mikinn þvott.  Hafið ekki of hátt hitastig. Vélin notar 30% minni orku, ef hitinn er lækkaður um þriðjung.   Sleppið forþvotti, ef þvotturinn er lítið óhreinn. Það sparar 20% orku.  Skolun með köldu vatni fyrir þvott getur sparað orku. Hvort sem um er að ræða þvottavél fyrir klæðnað eða leirtau, er hægt að sleppa forþvotti fyrir vikið.

Þurrkarinn
Vindið þvottinn sem best áður en hann er settur í þurrkarann.  Hreinsið lósíuna eftir hverja notkun.
Setjið hæfilegt magn af þvotti í þurrkarann, hvorki of mikið né of lítið.  Hvort tveggja veldur meiri orkunotkun en ef þurrkað er hæfilegt magn í einu.  Notið sparnaðarstillingu þegar henni verður við komið.

Örbylgjuofninn
Tími og orka sparast þegar matreitt er í örbylgjuofni. Það tekur 7 mínútur (0,14 kWh) að matreiða 250g af kartöflum í örbylgjuofni, en 25 mínútur (0,22 kWh) á eldavél.   Notið eldunaráhöld sem henta örbylgjuofninum. Sjóðið eða hitið matinn í lokuðum ílátum, þannig helst hitinn betur á matnum og orka sparast.  Með því að nota lítið vatn þarf styttri suðutíma. Oft er hægt að sleppa vatninu alveg þegar matreitt er í örbylgjuofni.

Eldavélin
Gætið þess að potturinn sé hæfilega stór á helluna. T.d. fer 20% orkunnar til spillis ef potturinn er 2 cm minni í þvermál en hellan.  Ósléttur botn á potti eða pönnu getur valdið 40% meiri rafmagnsnotkun.
Notið þétt lok á pottinn og takið það ekki af meðan soðið er. Ef lokið er ekki á pottinum þarf tvöfalt meiri orku en ella.  Það þarf tvisvar til þrisvar sinnum meiri orku að glóðarsteikja í ofninum en að steikja á hefðbundinn hátt.

Frystikistan
Æskilegt er að frystikistan sé á köldum stað. Hún notar 5% minna rafmagn fyrir hvert stig sem umhverfishitinn er lægri.
Hæfilegt hitastig í kistunni er um -18°C. Rafmagnsnotkunin eykst um 5% fyrir hvert stig sem hitinn er lægri.
Gætið þess að kæliristin á bakhlið kistunnar sé hrein og að nóg loft geti leikið um hana. Innilokuð og rykug kælirist getur valdið 30% meiri rafmagnsnotkun.  Látið frystikistuna ekki ganga tóma. Tóm kista notar jafnmikið rafmagn og full.

Ísskápurinn
Hæfilegt hitastig í kæliskápnum er -4 til 5°C. Rafmagnsnotkun eykst um 4% fyrir hvert stig sem hitinn er lækkaður.
Gætið þess að loftræsting sé nægjanleg bak við kæliskápinn. Léleg loftræsting getur valdið 5-10% meiri rafmagnsnotkun.
Kæliskápa sem ekki eru með sjálfvirka afhrímingu þarf að þíða reglulega.

Kaffivélin
Það sparast um 30% með því að laga kaffið í kaffivél í stað þess að nota hraðsuðuketil og hella uppá á gamla mátann.
Notið hitakönnu til að halda kaffinu heitu, en ekki hitaplötu kaffivélarinnar.

Gleymd notkun
Mörg heimilistæki nota rafmagn jafnvel þó að þau séu ekki í gangi. Þetta eru tæki sem búin eru fjarstýringu og eru tilbúin til að hlýða skipun frá henni t.d. sjónvörp, hljómtæki, myndbandstæki o.fl. Öll þessi tæki auka orkunotkunina. Þó svo að þau taki lítið afl er oftast kveikt á þeim allan sólarhringinn allan ársins hring.

Sjónvörp
Í sjónvarpi getur aflið, sem tækið notar þó slökkt sé á því með fjarstýringu, verið frá 3 til 18 Wött sem þýðir að orkunotkun þessa tækis verður milli 25 og 160 kWh á ári ef tækið er í sambandi allt árið. Þessa eyðslu má spara með því að slökkva alveg á sjónvarpinu auk þess sem það minnkar hættu á íkveikju.

Myndbandstæki
Myndbandstæki sem stjórnað er með fjarstýringu notar um 100 kWh á ári. Það að slökkva alveg á myndbandstækinu hefur bæði kosti og galla. Ef slökkt er alveg á tækinu sparast þessar 100 kWh en á móti þarf oft að endurstilla klukku og dagsetningu þegar kveikt er næst.

Önnur tæki
Spennar fyrir amerísk 110 volta heimilistæki nota orku þó svo að þau séu ekki í gangi. Þá er rétt að átta sig á því að ýmis tæki gætu verið tengd án þess að við munum eftir því t.d. loftnetsmagnarar, rafmagnsklukkur og klukkur í ýmsum tækjum eins og t.d. í örbylgjuofnum, eldavélum og útvarpsklukkum.

Þurfum við e.t.v. að vara okkur líka?

Fékk þetta sent með tölvupósti á netfang sem eiginlega enginn veit um, frá sendanda sem ég þekki ekki. Því miður verð ég að taka undir margt af þessu:

"DÝRMÆTAST ER FRELSIÐ.
Á bókamarkaðinn er nú komin gagnmerk bók um innflytjendamálin í Noregi, eftir Hege Storhaug í þýðingu Magnúsar Þórs og gefin út af Bókafélaginu  Uglu.   Kilja í 360 bls. Á góðu verði.
Bókin er eiginlega reynslusaga Norðmanna af meir eða minna misheppnaðri innflytjendastefnu gagnvart einum hóp innflytjenda, þ.e.a.s.  Múslíma.  Þar sem samþættingin hefur að stærstum hluta brugðist til óhemju tjóns fyrir hið norska samfélag.
 
Hún sýnir hvernig hópar Múslíma hafa misnotað gestrisni og velferðarkerfi Norðmanna, til að mata krókinn á kostnað almennings í Noregi.  Hún tekur fyrir ferjuhjónabönd, þvingunarhjónabönd,  pólitískar og einstaklingsbundnar hótanir og þvinganir  Múslíma í garð eigin fjölskyldumeðlima og annarra Norðmanna,  heiðursmorð, umskurði, pólitísk vers úr Kóraninum, ættbálkasamfélagið og hugsunarhátt hans, hjónaband systkinabarna,  skapandi svindl og hugmyndaauðgi varðandi þau mál, gildismat Múslíma, kennsluaðferðir þeirra og innrætingu,  hvernig Múslímar éta innanfrá gestgjafaþjóðfélagið og eyðileggja það smám saman eftir því sem þeim fjölgar,  hversu vel aðrir trúarhópar aðlagast að frelsinu í Noregi  auðtrúa og hrekklausa stjórnmálamenn  og svo mætti endalaust telja.

Bókin er hreinn fjársjóður fyrir þá sem vilja vera tilbúnir stjórnlausu innflytjendaflæði til Íslands um leið og við göngum inn í ESB og hafa hugmynd um það hvernig fást á við Múslíma sem hafa engar fyrirætlanir um að samþættast gestgjafaþjóðfélaginu á nokkur hátt  nokkurn tíman  og fyrirlíta gildismat þeirra og íbúa aðra en Múslíma..

------------------------------------

Arafat forseti Palestínumanna um árabil gaf þessi fyrirheit.  ,,Fyrst tökum við laugardagsfólkið (Gyðinga)  síðan tökum við sunnudagsfólkið (Hið Kristna Fólk)."

MBK

Skúli Skúlason

Netfang: [e-mail]

Jafningjafræðsla um efnahagsmál

Ég kann ekki fjalla um alþjóðaefnahagsmál. Ég er ekki hagfræðingur. Ég er ekki lánadrottinn. Ég hef ekki sambönd við þá sem með þessi mál sýsla. Ég skil ekki nógu vel þá gullmola sem hrjóta af vörum forystumanna og veit ekki einu sinni hvort það sé gull eða hráki. Ég skulda bara húsnæðislán. Hef alltaf borgað þær skuldir sem ég hef stofnað til. Hef m.a.s. alltaf gripið hverja krónu sem ég hef ekki nauðsynlega þurft að nota og sett hana á bankareikning. Þar með hef ég lært að ég hefði frekar átt að kaupa mér úlpu, snyrtivörur, skartgrip, úr, veski, fara í hárgreiðslu, leikhús, bíó, kaffihús og endilega kaupa mér "dekurdag" - eða dekurviku. Já, ég hefði getað borgað dekurmánuði fyrir það sem hvarf af sparireikningnum mínum.

 

Hvar eru höfðingjarnir núna, sem slógu um sig með því m.a. að veita sér allt ofangreint og rúmlega það?  Voru þeir í lúxus fyrir peningana úr sparibauknum mínum og allra hinna sparifjáreigendanna?

 

Hvað gerist þegar óreiðumaður* er kominn á hausinn og fjölskyldan** reynir að skjóta saman handa honum svo hann þurfi ekki að sofa á Miklatúni undir runna? Slær hann ekki bara fleiri lán***, hefur það fínt í rósrauðri vímunni, býður sukkvinum sínum á fínan stað og býður hvað eftir annað "á hringinn". Hvað er langt í að hann verði búinn að eyða familíusamskotunum og á ný komið að skuldadögum á nýja láninu?

Er einhver jafningi jafnari en ég og getur sagt mér hvernig allt þetta er í pottinn búið.

Hvernig er það með stóra lánið frá Alþjóðagjaldeyrissjóðnum? "Við vonumst til að þurfa ekki að nota það allt"

Þýðir það að IMF verður bakhjarl, tilbúinn með upphæð sem virðist þurfa til. Svo ef okkur spilast vel úr, þá þurfi ekki að taka allt lánið og firra okkur gífurvöxtunum?

Svona svipað og þegar fólk fær heimild fyrir yfirdrætti, svona til öryggis, en þarf svo ekki að borga nema af því sem það nýtir af heimildinni, - og ekkert (nema kannski þóknun) sé yfirdrátturinn ekki nýttur. 

KARDEMOMMUBÆRINN Í NÝJU LJÓSI; kreppuhönnuðirnir

ÚTRÁSARVÍKINGARNIR

Við býsna mikið berumst á,

til Bretlands erum farnir.

Í Danmörku flest keyptum, já

við útrásarvíkingarnir.

Við kaupum og seljum út um allt

og græðum meira en hundraðfalt.

Svo græðum við barasta meir og meir

já við Björgólfur, Hannes og Jón Ásgeir.

 

Við kaupa það sem finnum falt

í flestum skúmaskotum.

Og fljúgum síðan út um allt

á nýjum einkaþotum.

Og enginn spyr okkur ekkert um,

með alla pressuna í vasanum.

Svo græðum við barasta meir og meir

já við Björgólfur, Hannes og Jón Ásgeir.

 

BANKAMENNIRNIR

Við digrum samning erum á,

svo endalaust við græðum.

Í sjóði landsins nú skal ná

með nýjum hagnaðarfræðum.

Og til að halda okkur gangandi

við ruplum suður á Bretlandi.

Já, það er nú meira, hvað karlinn er klár,

já við Sigurjón, Welding og Heiðar Már.

Við veiðum stundum lax með lús

og leigjum þyrlur allir.

Við byggjum okkur lúxushús

og ljúfar sumarhallir.

Og ökum um á Roverum

og partý með útlendum söngvurum.

Já við erum alls engin meðalgrein flón,

já við Heiðar Már, Welding og Sigurjón.

 

ÞJÓÐIN

Dvel ég í draumaheim

og dýrka víkingana.

Sólarferðir, borga-geim...

og skíðaferðir plana.

Flatskjár, raðhús, freyðivín,

fellihýsi og sleði.

Svona líður ævi mín

í kaupæði og gleði.

 

DABBI

Hér mætir Dabbi, sjá

með alvæpni ó-já.

Með stýrivexti og verðbólgu

og vaxtahækkun, vá.

Í Svörtuloftum er

og stjórna öllu hér.

Hið litla, montna Glitnis-grey

nú mætti gá að sér.

Ég kalla: "Gagg með kló í Baugsins-skinni,

þá kveð ég, þér ég næ að þessu sinni.

Þó að það kosti kannski hér

að við steytum upp á sker,

þá tek ég bara allt heila klabbið

í hafdjúpið með mér - HA HA HA HA"

 

JÓHANNA

Ja fussum svei, ja fussum svei.

Mig furðar þetta rót.

Í hverju skoti skúm og ryk

og skran og rusl og dót.

Og skuldasúpa út um allt,

en eignir engar finn.

Víkingarnir flugu út

og hirtu afganginn.

 

Já ástandið er ansi svart,

já allt sem moldarflag.

Og kraftaverk nú þyrfti til

að koma öllu í lag.

Ég hækka bætur, hirði upp drasl

og hreinsa skítinn hér.

Já, núna loksins kom að því.

Minn tími kominn er.

 

ÚTRÁSARVÍKINGAR OG BANKAMENN

Hvar er bankinn minn?

Hvar er kaupaukinn?

Hvar er stóri feiti kaupréttarsamningurinn?

Hvar er flugrisinn?

Og hvar er Baugurinn?

Sérðu markað fyrir hlutabréfaviðskiptin?

Ég er viss um að það var hér allt í gær.

 

Sérðu gjaldeyri?

Sérðu markaði?

Eða síbrosandi stóráhættufjárfesti?

Sérðu þotuna?

Eða jeppana?

Sérðu fylgispöku faguryrtu þjóðina?

Ég er viss um að það var hér allt í gær.

 

Sérðu Illuga?

stuttbuxnastrákana?

Hvar er Bjarni Ben og menntamálaráðherra?

Hvar er Guðni minn?

og öll Samfylkingin?

Hvar er Björgvin, hvar er Solla, hver er forsetinn?

Ég er viss um að þau voru með í gær.

Já, ég er viss um að þau voru með í gær.

 

 

Sungið með sínu nefi - við þekkt lög úr nokkrum barnaleikritum.

Höfundur: Kalli.

 

Getur þú látið gott af þér leiða? Já, örugglega! : )

Þörf fyrir SPARIFÖT fyrir JÓLIN

Rauði krossinn leitar eftir aðstoð almennings til að gefa vel með farinn sparifatnað fyrir börn og fullorðna í sérstakri sparifatasöfnun laugardaginn 22. nóvember kl. 11-15. Með því að gefa í söfnun Rauða krossins er hægt að veita fjölskyldum og einstaklingum tækifæri til að eignast spariföt fyrir jólin í fataúthlutun félagsins eða fá þau á hagstæðu verði í Rauðakrossbúðunum.

Rauði krossinn hvetur alla til að kíkja í skápana og finna föt sem ekki eru lengur í notkun en gætu öðlast nýtt líf hjá nýjum eiganda. Tekið verður á móti sparifatnaðinum á átta stöðum á höfuðborgarsvæðinu.

Á höfuðborgarsvæðinu:
Kópavogur, sjálfboðamiðstöðin Hamraborg 11, 2. hæð

Hafnarfjörður, Rauða kross húsið Strandgötu 24 - inngangur frá Fjarðargötu
Garðabær, Hrísmóum 4, Garðatorgi
Álftanes, Haukshúsið á Álftanesi
Reykjavík:
Laugavegi 116, gengið inn frá Grettisgötu
Vífilfell hf. Stuðlahálsi 1- inngangur við hlið hússins (verksmiðjumegin)
Í hjólhýsi Rauða krossins við Menningarmiðstöðina Gerðuberg
Mosfellsbær, Þverholti 7

Leyfi mér að setja þetta inn, þar sem málefnið er gott og áríðandi.

GLEÐISÖNGUR SPARIFJÁREIGANDANS

Gæinn sem geymir aurinn minn

 

Ég finn það gegnum netið

að ég kemst ekki inn

á bankareikninginn,

en ég veit að það er gæi

sem geymir aurinn minn,

sem gætir alls míns fjár,

og er svo fjandi klár,

kann fjármál upp á hár,

býður hæstu vextina,

og jólagjöf hvert ár.

 

Ég veit hann axlar ábyrgð,

en vælir ekki neitt,

fær þess vegna vel greitt,

hendur hans svo hvítþvegnar

og hárið aftursleikt.

Þó segi' í blöðunum

frá bankagjaldþrotum

hann fullvissar mig um:

Það er engin áhætta

í markaðssjóðunum.

 

Ég veit að þessi gæi

er vel að sér og vís;

í skattaparadís

á hann eflaust fúlgur fjár,

ef hann kemst á hálan ís.

Því oftast er það sá,

sem minnstan pening á,

sem skuldin endar hjá. -

Fáir slökkva eldana,

sem fyrstir kveikja þá.

Október 2008.

Lagið við ljóð Davíðs Stefánssonar, - "Konan sem kyndir ofninn minn"

Kvikindislegur - óábyrg færsla - enda felubloggari (*-*)

 Lýtalækningar

Íslenskur lýtalæknir var staddur á ráðstefnu erlendis með kollegum sínum. Eftir langa og stranga dagskrá ráðstefnunnar héldu ráðstefnugestir á öldurhús og gerðu sér glaðan dag. Eftir því sem líða fór á kvöldið og nóttina þynntist hópurinn og lokst sátu einungis þeir þaulsetnustu eftir.
Þegar þeir höfðu ekkert meira að tala um fóru þeir að segja hetjusögur af þeim afrekum sem þeir höfðu unnið á skurðborðinu.

Einn Bretinn sagði sögu af því að hann ásamt teymi sínu hafi tekið á móti sjúklingi sem missti hendina í prentsmiðju. Á sjúklinginn græddu þeir nýjan handlegg, lófa og fingur og eftir að hann kom til starfa aftur varð hann svo góður og öflugur verkmaður að hann vann á við 4 og því fóru þrír á atvinnuleysisskrá sem áður störfuðu hjá fyrirtækinu.

Rússnenskum lækni fannst ekki mikið til þess koma og sagði frá manni sem lent hafði inní kjarnaofni. Þeir fengu ekkert annað en hárið inná skurðborðið til sín, græddu á það höfuð, búk og útlimi. Þessi maður varð svo góður verkmaður þegar hann snéri aftur til starfa að hægt var að segja upp heilli vakt í kjarnorkuverinu, 9 manns fóru á atvinnuleysisskrá.

Íslenski læknirinn sagði iss við þessari sögu. "Ég var einu sinni staddur niðrí Austurstræti og fann rosalega vonda prumpulykt. Ég veiddi hana í poka og brunaði með hana uppá Borgarspítala og skellti henni á skurðborðið. Við græddum á þetta búk, höfuð, útlimi og enduðum með að setja krullur ofaná þetta allt saman. Úr þessu varð Davíð Oddsson og hann er á góðri leið með að setja alla þjóðina á atvinnuleysisskrá".

Alls EKKI FYNDIÐ, bara svo afbragðsVEL gert

Margir hafa eflaust séð þetta eða heyrt. Ekki flokka ég þetta einu sinni undir 'tragikómedíu' hugsanlega frekar sem kómíska tragedíu.  Held að höfundurinn, Hallgrímur Helgason, hafi lesið þetta upp í "Kiljunni". Hvað með það, sjaldan er gott Visakort of oft strokið.

Ísland er stjórnlaust, því enginn því stjórnar
Ísland er fleki af dýrustu gerð
Ísland er landið sem Flokkurinn fórnar
Ísland á reki í sjónum þú sérð
 
Ísland í forsetans orðanna skrúði
Ísland sem bankana auðmönnum gaf
Ísland sem sonanna afrekum trúði
Ísland er land sem á verðinum svaf
 
Íslensk er þjóðin sem allt fyrir greiðir
Íslensk er krónan sem fellur hvern dag
Íslensk er höndin sem afvegaleiðir
Íslensk er trúin: "Það kemst allt í lag"
 
Íslensk er bjartsýna alheimskuvissan
um íslenskan sigur í sérhverri þraut
Íslensk er góðæris átveisluhryssan
sem íslenskan lepur nú kreppunnar graut
 
Ísland er landið sem öllu vill gleyma
sem Ísland á annarra hlut hefur gert
Íslenska þjóð, þér var ætlað að geyma
hið íslenska nafn sem þú hefur nú svert
 
Íslandi stýra nú altómir sjóðir
Ísland nú gengur við betlandi staf
að Íslandi sækja nú alls konar þjóðir
Ísland er sokkið í skuldanna haf
 
Höf: Hallgrímur Helgasson

 

Tapaði engu í dag - þvert á móti

 

 

Bíllinn minn gamli, sem nú hefur safnast til feðra sinna, arfleiddi mig af næstum nýjum dekkjum sínum.

Bíllinn minn fíni, aldrei átt annað en gamlar druslur hingað til, var á ónýtum dekkjum.

Nú voru góð ráð og góð dekk, dýr.

Hringdi í 6-8 dekkjafyrirtæki til að kanna verð og hvort tekin væru næstum ný en aðeins notuð dekk "uppí"

Það er skemmst frá því að segja að verð á "ganginum" var frá 37.000 til 54.000 MEÐ umfelgun.

GÚMMÍVINNUSTOFAN í Skipholti kom lang, lang, lang best út og stórum betur en Vaka sem á að vera svo "ódýr"

Ég spurði eiganda GÚMMÍVINNUSTOFUNNAR hvort ég mætti setja upplýsingar um þeirra frábæru þjónustu og sanngjarn verð, á bloggið mitt. Hann var auðvitað bara ánægður með það.

Nú ek ég um með stolti og öryggi á dekkjunum frá þeim.

Nú getur helv... snjórinn komið ef hann þorir. 

Sekt, sakleysi, þöggun, leynd, varúð

 

Enn síður en aðrir veit ég hver er sekur eða saklaus. Og enn síður á hvern hátt þeir seku eru sekir. Og allra síst hvernig þeir fóru að því.  Hafi þeir gert þetta "alveg óvart" eru þeir heimskir upp til hópa og hafa ekki verið starfi sínu vaxnir.  Hafi þeir gert þetta allt af ráðnum hug, hafa þeir líka verið vanhæfir, - vegna saknæmra vinnubragða.  Sem sagt réttir menn á röngum stöðum, eða rangir menn á/í réttum stöðum, hvernig sem á það er litið.

Eitt verð ég þó að segja að mér finnist sérkennilegt. Fólk sakar ráðamenn, með forsætisráðherra í fararbroddi, um leynd, skort á upplýsingastreymi og þumbarahátt.

Auðvitað á að upplýsa almenning um ástand, horfur og bjargráð, EN það er ekki hægt að segja öllum frá öllu meðan á samningaumræðum og -gerð stendur.  Það getur beinlínis sett áætlanir og samninga í uppnám ef fréttist um ráðabrugg og herbrögð.

Við erum ekki sambandslaus við umheiminn og heimurinn fær bitastæðar fréttir af okkur.

Fáir gleyma að það fréttist í Bretaveldi það sem seðlabankastjóri sagði í sjónvarpsviðtali, - áður en hann frétti að hann hefði haft þau ummæli. (Nenni ekki að rekja nöfn og málefni, það vita allir um/við hvað er átt) Þau ummæli hafa sennilega dregið stærri dilk á eftir sér heldur en nokkurn tíma mun koma af fjalli.

Það er ekki hægt að segja öllum allt, jafnóðum. M.a.s. í bílakaupum þarf svolítið "pókerfeis". Maður er e.t.v."volgur" gagnvart 3-4 bílasölum - hefur ekki gert upp hug sinn. Fleiri en einn er um hituna á hverjum stað - hver með sína hugmynd um "sanngjarnt" verð.  Það er sko hreint ekki hægt að vera í sambandi við alla þessa aðila á meðan pælingarnar fara fram. Þú vilt fá besta kostinn (helst á lægsta verðinu) á sanngjörnu verði m.v. það sem þú getur fram reitt og fá að vita nákvæmlega þau kjör sem áhvílandi lán hefur. Er bíllinn á ónýtum dekkjum og er ódýrari þess vegna.  Á "hinn" biðillinn reiðufé, býður hann þá lægra og sleppur með það. Er bíllinn sem "hinn" vill ekki kannski svolítið dýrari af því að góð dekk á felgum fylgja?  Er "hinn" búinn að fatta það og þar með að óhætt sé að borga dálítið meira. Eða býður hann of lítið af því að hann veit ekki af þessum kaupbæti?

Þetta lítur nú út fyrir að vera bílakaupasaga mín (sem hún er) er þetta gæti líka alveg verið gjaldeyrislánasamningsumræður í ansi smækkaðri mynd... Gætum við haft það svona í hugskotinu?   Er hægt að skilja eitthvað af "pukrinu" þegar maður setur það í samhengi.

Hef aldrei kosið Sjálfstæðisflokkinn, aldrei viljað neitt með þá hafa nema þá í von um að græða eitthvað (t.d. molakaffi) en ég treysti forystumönnum vel til að vinna í þessum næstum ókleifu málum. Hvort sem það eru Gissur, Geir, Gunnar, Héðinn eða Njáll sem nú standa uppí lagklaufir í annarra manna skít, vil ég trúa að þeir geri það besta sem hægt er í stöðunni.

Það er allavega enginn annar sérstakur sem ég vildi frekar. Sumir kynnu að segja að lítill munur væri á kúk og skít en þá svara ég - að ég vilji frekar þekktan kúk en ókunnan skít.

 

 

Ef of mikið er lagt á asna: Hlassið hrynur - hann í lausu lofti.

 

 

 ES  Já, ég keypti bílinn sem var seldur í október!      

Lítil og krúttleg bankasaga (*&*) VÁ, TILBOÐIÐ, mar!

Veit ekki hvort skal brosa eða yggla sig við svona framsetningu, allavega fæ ég svokallaðan aulahroll. Annað hvort er bankinn (markaðsdeildin) fífl, eða þeir halda að fólk sé fífl eða, það sem verst væri, - að fólk væri í raun fífl. Hafi ég skilið þetta vitlaust, þá er ég auðvitað fíflið

Banki auglýsir þessa dagana að þeir sem leggi inn eða stofni ákveðinn reikning fyrir 10. nóvember, fái 10% vaxtaálag á áunna vexti.

Þar sem skuldir mínar voru skráðar með ósýnilegu bleki, telst ég enn til milljónamæringa. Gott væri því að geyma svo sem ein mánaðarlaun á góðum reikningi (hefði ég haft rúmar 62.000.000 "meðan allt lék í lyndi" hefði þetta skipt nokkru). Reiknaði svo með leifturhraða eins og eðalfífl gera og fíflaútkoman var þessi:

Legg inn 100.000 þann 10.nóv

Vextir á reikningnum eru sennilega aðeins undir verðbólgu, ágætir samt í þessu fjandans ástandi - 17,2%.

Vextir til áramóta yrðu kr: 2.388

10% vaxtaálag yrði því 239 krónur.

Vonandi er hægt að ganga frá þessu í heimabanka, annars færi "ábótin" í bensínkostnað

Jafnvel þótt gamli maðurinn sem ekki á tölvu færi í strætó í bankann, dygði þetta ekki til.

AUÐVITAÐ yrði þetta rosalegt ef maður ætti milljón - þá næði maður fyrir pizzu; 2388 krónum.

Úlfaldi í kvöldmat

... nei honum var ekki BOÐIÐ í kvöldmat, heldur borðaður í kvöldmat (og aftur og aftur og aftur :( 

Ég fékk svo uppörvandi og vingjarnlega athugasemd frá góðum bloggvini að nú klessi ég einni færslu í andlitið á ykkur, enda ekki skrifað stafkrók í mánuð.

Svona var athugasemdin: "En hvað í ósköpunum hefur orðið af þér? Það vantar blogg frá þér" 

Þetta var allt sem þurfti til að lyfta sjálfstraustinu og framkvæmdaseminni aðeins > > >

Ekki hefur mér hlýnað svo um hjartarætur sem nú :)  Einhver SAKNAR mín!!!! Ó, ó, ó mig auma, mín litla sál er sorfin innað ósæð, þar sem hún nú hefur bústað fyrir þína tilstuðlan.

En, svona eftir að skrifað texta sem Shakespeare einn hefði getað þýtt, þá var sú blessun yfir mér að ég hafði borgað stórar fúlgur fyrir utanlandsferð, áður en efnahagsóveðurskýin lögðust yfir láð og lög. Jóhanna Kristjónsdóttir, sem leiddi okkur til Útlandsins, var búin að fá næstum allt borgað frá okkur (23 manns), e-ð hafði vantað, Spron hljóp undir bagga í viku eða tvær. Allt greitt í topp áður en fjandinn varð laus.

Er því að KOMA FRÁ LYBIU. Öllum leið hálfilla fyrst. Svo var samið um að allir mættu tjá sig ef hrollurinn yrði yfirþyrmandi..... en ekki velta sér uppúr þessu. Svo var lagt í'ann suður eftir til Sahara.

Verð að þakka það og lofa að flest slæmt gleymdist þegar við þeystumst yfir sandöldur og -víðáttur og svo sofnaði ég þar á dýnu undir stjörnubjörtum Sahara-himninum inni á milli (sand-) fjallanna og hafði horft uppí stjörnuhvolfið a.m.k. 360° !!! Eftir +30°C heitan daginn var reyndar andsk... hrollkalt um nóttina þegar andinn fór í +4°C.

Þeir vita það allir - m.a.s. bandaríski Búskurinn

Geðlyf hljóta nú að fara að seljast sem aldrei fyrr. Flestir að fara á taugum yfir fréttum og hrakspám. SVO HEYRIST Í LANDSINS FEÐRUM (og mæðrum?) Noh, nú ætla þeir að gera skurk!

Nú veit maður að allir kunna lausn efnahagsvandanum!! Jésss. Stuna. Andvarp... Þvílíkur léttir. Ekki kann ég neina lausn. Gott að hafa fræðinga, ráðgjafa og yfirvöld sem vita hvað gera skuli.

Ég heyri

ráðherra,

almenna þingmenn (stjórnar- og stjórnarandstöðu-), 

ráðuneytisstjóra,

ráðgjafa,

stjórnmálafræðinga,

hagfræðinga,

forstjóra og

stjórnarformenn fjármálastofnana,

hagstofnun,

kauphallarmenn,

seðlabankastjóra,

viðskiptajöfra og

ég kann ekki fleiri titla og biðst velvirðingar ef einhverjar rangfærslur komu fram. Hvað með það, allir ofangreindir og fleiri til, hafa opinberað FULLKOMNA KUNNÁTTU SÍNA um hvað beri að gera til að reisa efnahagslífið við. Þetta hef ég hlustað á undanfarið. ÞÁ VITUM VIÐ ÞAÐ.

Það verður að draga úr verðbólgu

Vextir verða að lækka

Stýrivextir verða að vera raunsannir 

Verðum á  ná jafnvægi

Verðum að koma markaðnum í gang

Verðum að leggja okkur fram

Verðum að tala í lausnum

Verðum að ná verðbólgu niður

Verðum að vinna saman 

Verðum að ræða ástandið

Þurfum víðtæka samstöðu

Verðum að knýja fram aukinn hagvöxt

Atvinnuþróun má ekki stöðvast

Það verður að grípa til aðgerða

Verður að styrkja gengi krónunnar 

Verður að stefna að uppbyggingu

Verðum að vinna traust á Íslandi

Þurfum að vera samkeppnishæf og

Verðum að standast samkeppni

AÐGERÐALEYSI ER EKKI VALKOSTUR. 

 

OG? 

Er eitthvert okkar sem vissi þetta ekki? Megum við ekki ætlast til að valdir leiðtogar, embættismenn og ráðgjafar geri annað og meira en að segja okkur hvað sé að?

Værum við ánægð með lækni sem lýsti fyrir okkur þeim kvillum sem okkur hrjáðu og sendu okkur svo út' Ætluðumst við ekki til að hann reyndi einhvers konar meðferð við sjúkleikanum?

Ástandið síast inní alla, hvort sem þeir skilja eður ei.  Lítil frænka mín (nýlega 4ára) spurði mig á dögunum:  "Eru bankarnir sterkir?" Geri ráð fyrir að hún hafi heyrt þetta útundan sér og sennilega velt því fyrir sér hvort þeir hefðu krafta í kögglum.

 

Nú eru þeir lánlausu, lánsamir!

Eignalausir lífeyrisþegar hafa engu að tapa!? 

HEYRT OG SÉÐ . . . .(ekkert um Glýttnir)

Málfar í auglýsingum og víðar...

"... óskum eftir starfsmönnum til starfa á leikskóla..." (augl)

"... er vinsælasta efni við liðverkjum í Noregi ..."    (augl)

... í gönguferðum "er ég alltaf með tvo sokka meðferðis"  (fararstjóri)

... göngufólk ætti "að eiga tvo skó" (sami fararstjóri) 

"... rifta einhliða af öðrum aðilanum"   (útvarp)

"... varð fyrir því að tjóna bílinn..."    (þáttargm. í útv.)

"... þegar fólk hefur lent í tjóni"  (þáttgm. útv)

"Ég var að forða slysi"  (þáttgm.útv)

"... eins og ég segi alltaf: "Róm var ekki byggð á einni nóttu""  (vikulega í útv.)

"Þeir voru báðir ósammála"  (útvarp)

"Ungur maður stórslasaður eftir slagsmál við Austurbæjarskóla" (dagbl)

************************** 

Ofnotað, ofnotað, ofnotað. Skeyti í eina setningu útþvældum sápukúluorðum sem stjórnmálamenn og fleiri nota í ofskömmtum);

Þeir sem ekki eru öruggir um sitt bakland fyrir þessa vegferð, verða að taka til í eigin ranni fyrir ef þessi leiðangur á að takast

Lifandi dæmi um lánleysi lánsglaða landans

 

Þessa dagana er ég að leita mér að bíl. Það sem er óvenjulegt núna, eins og flestir vita, er gífurlegt framboð og mikil verðlækkun... sem kemur mér og öðrum kaupendum auðvitað afar vel.

Veit samt ekki hvort ég hef brjóst í mér til að prútta við eiganda sem þarf að selja í neyð á niðursettu verði.

Reyndar hef ég aldrei selt bíl. Kaupi bara bíl og keyri hann síðast bensínlausan í til þess gert port.

Til að byrja með hef ég skimað á bílasölusíðum og -spjalli. Veit svona nokk hvað ég vil, allavega hvað ég vil ekki. Tel mig geta keypt eitthvað sem ég þarf ekki að keyra í port næstu 5-6 árin.

Maður verður bara grátklökkur við að lesa tilboðin. Í fyrsta lagi hvað margir bílar eru til sölu og hve sölubílar eru með hátt hlutfall verðsins í áhvílandi lánum. Fyrstu bílaárin mín, nennti fólk varla að gá í veðbækur að áhvílandi bílalánum, það var svo sjaldgæft.

Í öðru lagi var ógrynni bíla sem þurfti ekki að borga neitt út, bara taka yfir lánin. Ég er ekki á því að yfirtaka lán nema með þeirri vissu að borga mætti þau upp á stundinni.

Loks var það sem mér þótti mest "hrollvekjandi" (ath meðvirknin), fann reyndar bara eitt slíkt dæmi; það var góður bíll og ekki þurfti að reiða fram neina borgun (yfirtaka áhvílandi lán) og seljandinn bauð kr: 350.000 í vasann til kaupanda!!!   Þótt hann hafi verið vitlaus á sínum tíma ætla ég ekki aðf ramkvæma samskonar vitleysu núna.

 

Mér er „stirt um stef" þegar ég hugsa til alls þess fólks (ekki bara unga fólksins) sem hefur litið á allt að 100% bílalán sem lottóvinning. Nú verður sama fólkið að byrja að hugsa, kannski heldur seint.

Meðvirkni er aðalorðið nú til dags, svo ég hlýt að koma upp um meðvirkni mína með því að kunna ekki við að prútta við „þessi grey".

Mörgum sinnum í fyrsta sinn

Hvað er hægt að fara oft til útlanda, - í fyrsta sinn? Rökleysa.

Fyrst flugvél, millilent í Færeyjum (fyrsta skipti utan Íslands) Eina "lífsreynslan" var FLUGferðin (og "hýruvognar" á flugvellinum (kann ekki að stafsetja; leigubílar) )Svo var haldið til Noregs; fyrsta sinn í útlöndum, utan flugvallar/stöðvar. Síðar hin Norðurlöndin og önnur Evrópulönd ekki stórt stökk. Á Grænlandi er landslagið of íslenskt til að vera almennilega framandi, þótt fólk, byggingar og mennig væru það. Spánn: Vá, í fyrsta sinn sá ég umhverfi, byggingar, landslag, þorp, borg(ir) og menningu sem var allt öðruvísi en ég hafði séð þangað til.

Í Búlgaríu þurfti ég í fyrsta sinn að læra stafróf til að komast um. Magnað.  Bretlandseyjar kunnulegar vegna sjónvarps og kvikmynda.  Grikkland var öllu menningarlegra en Spánninn sem ég hafði séð. Í fyrsta sinn fann ég hreinlega lyktina af fornri menningu. Þau ríki sem ég heimsótti í N-Am. voru bara eins og sakamálamynd og maður bjóst við krimma úr hverjum króki.

Kúba er svo sannarlega "fyrsta" sinni á margan hátt. Ærði óstöðugan upp að telja upp. Ber mér e.t.v. seinna  á brjóst og segi frá fólki og fyrirbærum þar. Í Rússlandi bjargaði mér Búlgaríuferðin 30 árum áður, gat nú stautað mig framúr kyrillíska letrinu. Gott og vel, ég fékk í fyrsta sinn að standa á Rauða torginu, sem mig hafði dreymt um frá því að hafa séð hersýningar þaðan.

Áratugum eftir fyrstu "fyrstu" utanlandsferðina fór ég loksins í "FYRSTU UTANLANDSFERÐINA" Hélt ég hefði nú "siglt" vel, mikið og lengi og séð flest :)  Þá var ráðist í Austurlönd nær (sem flestir kalla, ranglega, Mið-Austurlönd (beint úr ensku: Middle East))

Líbanon (Beirút) var fyrsta arabalandið. Var í dulúðugu "fréttalandi" sem ég þekkti fyrir allt annað en góðar fréttir. Fórum í illræmdar flóttamannabúðir fyrir Palestínufólk. (löng saga og hroðaleg)

Næst var Sýrland. Nei, þá varð Líbanon bara vestræn neysluborg í samanburði. Hæ og hó. Hérna gengu þá postularnir um og hryðjuverkamennirnir*(* þessir með köflóttu (Arafat) -klútana ráku rollur eða úlfalda á undan sér (hélt það væru uppreisnarmenn með þessa klúta, reyndust þá bara vera sveitamannaklútar til að verja kollinn gegn hita, sól og sandi.  Maður var með sleffarið niður eftir bringunni allan tímann, Allt, ALLT var framandi; ALLT VAR FYRST.

Með þessa endanlegu fyrstu reynslu var þetta líklega komið. Hafði reyndar aldrei komið til Kína (eða önnur Austurlönd fjær) né til Suður Ameríku, en það væri sko hægt að drepast sáttur með þessa blessun fyrir ferðafíkil.

Fíknin lét aftur sér kræla; > Jemen og Jórdanía. Þá var komið að því að vera í fyrsta sinn í HEIMI sem ég þekkti hvorki haus né sporð á. Ferðalangurinn ég, hafði aldrei upplifað neitt í líkindum við Jemen. Það er nú eftirlætislandið mitt. Það var eins og að fara í tímavél (langdræga) og það í öðrum heimshluta og óraunverulegt að fá að synda í Rauða hafinu... með sundgleraugu þegar strákarnir syntu í buxunum sínum og stelpurnar í kjólunum!   Ævintýri lífsins.

 Við Rauða hafið

Eftir Jemen varð Jórdanía einhvern veginn útundan í huganum EN hún bauð manni þó í fyrsta sinn að sitja eða liggja (eiginlega ekki hægt að synda) í Dauða hafinu.

  Flatbakað í Dauða hafinu.

 

 Frá Sana'a, höfuðborg Jemen

Sú öðlingskona, Jóhanna Kristjónsdóttir, tekur að sér að finna gistingu o.þ.h. og fer alltaf með okkur. Öllum velkomið að taka þátt (Núna í október förum við til LYBIU. Sofum m.a. í tjöldum í Sahara)

 

KONUR ?!#@!!&+/-

 

Kynþáttahatarar og trúarbragðaofsækjendur

Þetta er fólk oft kallað að ósekju, svo sennilega lendi ég í þeirri þró. Reyndar virðast fæstir aðgreina þetta tvennt og kalla bara alla "rasista" (hefur hreint ekki neitt með trúarbrögð að gera, en rase d. eða race e. þýðir einfaldlega kynþáttur).

Kveikja:  Áhlaup gert á húsnæði útlendinga. Uppi fótur og fit. Lögreglan fordæmd. Fólkið mótmælir, m.a. með hungurverkfalli. Almenningur hneykslast á því að fólkið skyldi vera vakið eldsnemma og sumir verið á nærklæðum einum, fengið lögguna "inná" sig og þurft að láta e-ð af eigum sínum af hendi; hafi verið niðurlægt á ýmsan hátt.

Vangaveltur: Af hverju gert áhlaup? Jú, vitað var að e-r íbúanna hefðu brotið lög og reglur. E.t.v. aðeins vitað um e-a ákveðna (einn eða tvo?) en allt eins líklegt að e-r fleiri hefðu e-ð að fela.

Aðgerðaleysi: Hvernig væri umræðan / viðhorfið ef lögreglan hefði kurteislega boðað komu sína á "eðlilegum" fótaferðatíma? Tekið svo viðtöl við hvern og einn, skipulega. Gæti hvinið í e-m. Ég hefði a.m.k. hneykslast á fávitahætti löggunnar þegar upp hefði komist að brotnir pottar hafi leynst ansi víða. Sauðir! Hvað eru þessir hálfvitar að hugsa! Örugglega ekki neitt!

Niðurlæging: Mér þykir niðurlægingin aðeins hjá þeim brotlegu sem upp um komst! Hitt er að sönnu ömurlega óþægilegt og þreytandi að láta tæta allt hjá sér af því að e-r annar er sekur.

Öryggis - niðurlæging: Hvað eru margir flugfarþegar með vökva til sprengjugerðar í handfarangrinum, eða önnur vítistæki? Sennilega afar fáir, en það hefur þó gerst; þeim rænt eða þaðan af verra.  Samt er leitað í ÖLLUM handfarangri. Maður verður fúll, ef ekki snakillur, þegar hella þarf niður Svalanum úr pela barnsins, maður látinn henda naglaklippunum sínum, látinn fara úr skóm og jakka. Rífa af sér beltið, skartgripi og mynt og SAMT baular viðvörunarbjallan (um að maður gæti verið í Al Kaída) þótt maður sé sárasaklaus af öðru en því að vera með varahlut í mjöðminni.

Hverjum þykir ekki óþægilegt (sumum niðurlægjandi) að þurfa að láta taka ljósmynd af sér og fingrafar. Stundum sýnis manni jafnvel að vörðurinn sé að leita að andlitsdráttum sem komið gæti upp um ill áform manns.  Það er allt að því ógnvekjandi að vera dreginn afsíðis með vopnuðum verði, til að láta þukla á sér og leita.

Fyrir hverja:   Flest látum við þetta yfir okkur ganga. Fyrst og fremst vegna þess að þessir verðir sjá um að tryggja öryggi okkar eins og best verður á kosið. Reyndar hefur maður orðið vitni að n.k. "kasti" hjá farþega.  Manni finnst samt að stundum sé of langt gengið í hörku, en ekki veit maður við hvers konar fólk þetta starfsfólk hefur þurft að eiga við.

Eitt yfir alla:  Þrátt fyrir lítið framboð á flugræningjum og óyndismönnum s.s. í flugvélum þá verður eitt yfir alla að ganga. Það er ekki vitað hver er hvurs eða hvenær svo við lendum öll í þessari svokallaðri niðurlægingu.